کوئٹہ میں القدس ریلی پر حملہ امت مسلمہ کو تقسیم کرنے کی صیہونی سازش ہے، حماس 

دمشق (اردونیوزمیگزین رپورٹ ) اسلامی تحریک مزاحمت ”حماس“ نے جمعتہ الوداع کے موقع پر بلوچستان میں القدس سے یکجہتی کیلئے نکالی گئی ریلی پر دھماکوں کی شدید مذمت کرتے ہوئے شہداء کے لواحقین سے گہری ہمدردی کا اظہار کیا ہے۔ دمشق میں حماس کے میڈیا سینٹر کی جانب سے جاری ایک تازہ بیان میں کہا گیاہے کہ حماس پاکستان کے شہر کوئٹہ میں جمعتہ الوداع کو دفاع القدس کیلئے نکالی گئی ریلی پر حملے کو ایک مجرمانہ اقدام قرار دیتے ہوئے اس کی شدید الفاظ میں مذمت کرتی ہے اور حماس کو ریلی پر حملے میں بے گناہ شہریوں کی شہادت پر گہرا دکھ ہے۔حماس نے پوری مسلم امہ پر زور دیا کہ وہ فرقہ وارانہ فسادات سے خود کو بچاتے ہوئے اسلام کے جھنڈے تلے متحد ہوجائے، بالخصوص فلسطین، مسجد اقصیٰ اور بیت المقدس صرف فلسطینیوں کا مسئلہ نہیں، یہ پوری مسلم امہ کا اجتماعی مسئلہ ہے، اس کے حل کیلئے عالم اسلام کو متحد ہونا ہوگا۔